Hawliau Dynol ydi’r hawliau a’r rhyddid sylfaenol sy’n perthyn i bawb yn y byd, o’r crud i’r bedd. Mae gen ti hawliau dim ots o ble rwyt ti’n dod, beth wyt ti’n ei gredu neu sut wyt ti’n dewis byw dy fywyd.  Mae Hawliau Dynol yn werthoedd sy’n cadw’r gymdeithas yn deg, gyfiawn a chyfartal.  Maent ar waith i amddiffyn plant, yr henoed, a phawb yn y canol. 

Gwyliwch y fideo hwn i ddysgu mwy neu cliciwch ar y ddolen am restr lawn o Hawliau Dynol.

Mae gan bawb Hawliau Dynol, ond mae gan blant a phobl ifanc dan 18 oed hawliau ychwanegol i’w helpu i gyrraedd eu llawn botensial a byw bywyd llawn a hapus. Enw’r ddogfen sy’n amlinellu’r hawliau hyn yw ‘Confensiwn y Cenhedloedd Unedig ar Hawliau’r Plentyn’ (CCUHP).

Mae CCUHP yn cynnwys 42 o hawliau y mae gan unrhyw unigolyn dan 18 oed yr hawl iddynt. Mae hefyd yn cynnwys 12 erthygl sy’n egluro sut y mae’n rhaid i oedolion a llywodraethau weithio gyda’i gilydd i gefnogi eich hawliau. Yr UDA yw’r unig wlad nad yw eu llywodraeth wedi ymrwymo i gefnogi hawliau plant.  

Mae pedair erthygl allweddol sy’n ffurfio sail CCUHP. Sef:

Erthygl 2: cael eu diogelu rhag gwahaniaethu

Erthygl 3: bod eu lles pennaf yn brif flaenoriaeth

Erthygl 6: byw a chyrraedd eu llawn botensial

Erthygl 12: cael dweud eu dweud ar benderfyniadau sy’n effeithio arnynt

Comisiynydd Plant Cymru – yma gallwch ddod o hyd i wybodaeth am gefnogi Hawliau Plant yng Nghymru a chael crynodebau hygyrch o CCUHP (cyswllt cymraeg).

Achub y Plant – yma gallwch ddod o hyd i wybodaeth gefndir a throsolwg da o CCUHP (dolen Saesneg yn unig).

UNICEF – yma gallwch ddod o hyd i drosolwg manwl o CCUHP, yn cynnwys poster crynodeb a dogfen PDF manwl (dolen Saesneg yn unig).

Dual Frequency – yma gallwch ddod o hyd i drosolwg hawdd i’w ddarllen o erthyglau CCUHP, gyda lluniau (dolen Saesneg yn unig).