Pwyntiau Allweddol

Mae Cetamin yn sylwedd powdr gwyn sydd hefyd yn gallu bod mewn ffurf hylif clir neu dabled.   Pan mae’n cael ei lyncu mae’n gallu blasu’n eithaf chwerw.

Bydd y rhan fwyaf o ddefnyddwyr yn snwffian Cetamin mewn ffurf powdr ond mae rhai yn ei chwistrellu.

Rhai enwau stryd cyffredin yw:

• Donkey Dust
• K
• Ket
• Special K

Mae’n cael ei ddefnyddio’n feddygol gan Barafeddygon a Meddygon fel math o esthetig neu boenladdwr i gleifion sy’n dioddef trawma corfforol.   Mae hefyd yn cael ei ddefnyddio gan Filfeddygon ar anifeiliaid mawr a bach ar gyfer yr un defnydd.

Mae’n cael ei adnabod fel cyffur datgysylltiol sy’n rhoi profiad allan o’r corff i ddefnyddwyr.

Y Gyfraith

Mae Cetamin yn gyffur Dosbarth B.

Mae’n golygu ei fod yn anghyfreithlon ei gael yn eich meddiant, ei gyflenwi neu ei gynhyrchu.

Os canfyddir rywun â Cetamin yn ei feddiant, gallant wynebu 5 mlynedd yn y carchar, dirwy ddiderfyn neu’r ddau.

Gall rhywun sy’n cyflenwi Cetamin wynebu 14 mlynedd yn y carchar, dirwy ddiderfyn neu’r ddau.

Mae gyrru dan ddylanwad Cetamin yn beryglus ac yn anghyfreithlon. Os canfyddir chi yn euog o hyn yna gallwch wynebu dirwy drom, eich atal rhag gyrru neu ddedfryd carchar ac o bosibl y tri o’r rhain.

Effeithiau ar y corff a risgiau

Mae cymryd Cetamin yn gallu gwneud i chi deimlo yn:

• Freuddwydiol a datgysylltiol
• Ymlaciol a hamddenol
• Penysgafn a dryslyd

Mae hefyd yn gallu gwneud i chi weld pethau a’ch rhoi mewn rhywbeth a elwir yn “K hole” sy’n fath o “daith” ble rydych yn teimlo eich bod wedi eich datgysylltu o’ch corff a dim rheolaeth dros eich corff na beth sy’n digwydd iddo.

Mae’n cymryd oddeutu 15 munud i gael effaith ar ôl ei snwffian ac mae’n gallu para 30 munud i awr.   Mae’n gallu cael ei ganfod yn eich system am tua wythnos.

Y Peryglon

Gan ei fod yn esthetig nid ydych yn teimlo unrhyw boen a phan mae’n cael ei gymysgu gyda sylweddau eraill mae’n gallu bod yn angeuol.

Mae ei effeithiau datgysylltiol yn gallu gwneud i chi deimlo wedi eich parlysu ac felly yn gallu bod yn fregus i ymosodiad, dwyn oddi arnoch neu ymosodiad rhywiol.

Y prif effaith ar y corff a’r prif risg yw’r effaith hirdymor ar y bledren.   Mae’n gallu arwain at Syndrom Pledren Cetamin.   Dyma pryd mae Cetamin yn llosgi leinin mewnol y bledren sy’n golygu bod angen triniaeth lawfeddygol neu hyd yn oed dynnu’r bledren.

Prif symptomau hyn yw crampiau difrifol a elwir yn “grampiau K” neu waed yn y dŵr.

Dylai defnyddiwr geisio cymorth meddygol ar unwaith ar y pwynt hwn.

Yn ogystal â’r effeithiau a pheryglon corfforol. Mae Cetamin yn gallu gadael defnyddiwr gyda materion iechyd meddwl fel gorbryder ac iselder drwy ddibynniaeth a hyd yn oed cyfnodau seicotig oherwydd effeithiau rhithweledol Cetamin.

Gyda holl sylweddau mae yna berygl y gallwch gymryd gorddos a marw.

Os hoffech ragor o wybodaeth am y testun hwn neu os oes gennych chi unrhyw gwestiynau galwch draw i’r Siop INFO neu cysylltwch â ni ar 01978 295600 / Neges wib.  Gadewch neges a byddwn yn cysylltu â chi cyn gynted â phosib.